آنا و پوچتاليون
بؤلوم : شعرلر یازار : اوختاي نژادمحمد 0 باخیش
آنا چؤرگي
آنا چؤرگي
بو باغين باشقا گؤزلليكلري وار،
بويلانيب اينجه چيچكلر، اوتلار.
اوخشايير بير داها شاعر گؤزومو،
بوردا سربست سانيرام من اؤزومو.
گونشيمدن يئنه قوووت آليرام،
نه وئريرسه بو طبيعت، آليرام.
نئچه آيدير كي، شهردن اوزاغام،
سو، هاوا، مئيوه جهتدنسه توخام.
دئييرم ماهني ياشيل مئينهلره،
اوزومو بلكه بو ياي بوللو وئره!
ياشاماز، اولماسا اينساندا اينام،
هله ساغدير قوجا، آغبيرچك آنام.
اللشير عشق ايله متبخده يئنه...
قوجالار گلمسهلر باغ يئرينه
بير چوخ ايشلرده بيز عاجيز قالاريق،
نه دئييم، دادلي يئمكسيز قالاريق.
آنا! هر يئرده يئتيرسن كؤمهيه،
بلهدم سن بيشيرن هر خؤرهيه.
يئنه دوشموش باشيما ايستي چؤرك،
سؤزومو سن يئره، گل، سالما گؤرك.
آنا جان! تنديره دولدور اودونو
سئير ائدك تنديرينين گور اودونو.
چك، تئز اول كيبريتي، يانسين تندير،
بير قيزيل رنگه بويانسين تندير.
گؤيه قالخسين باجاميزدان توستو،
ييغيلاق دؤورنه آخشاموستو.
قولاق آس گؤر سنين ايلكين نه دئيير:
سن محبتله يوغوردوقجا خمير
بو ايشيندن، آنا، لذت آليريق،
او آريق اللره حئيران قاليريق!
كس، توتوق كوندهلري، دوز تاباغا،
جانيميز قوي سنه اولسون ساداغا.
سنه زحمتسه ده، تئز كوندهني ياي،
ياي، ناخيش وور، آنا جان، تنديره ياپ.
يوخ، يانيلديم، منه بير آن قولاق آس،
بزه آنجاق اونو خاشخاشلا بير آز.
بنزهسين بير قدر اولدوزلو گؤيه،
هر گؤرن سؤيلهسين احسن چؤرهيه!
گؤرورم كوندهلرين بوللوغونو،
گئي قالين الجهييني، قوللوغونو.
قويما اود قارسالاسين اللريني،
باغلا يايليقلا دوماغ تئللريني.
قوي بيزيم حسرتيميز تئز بيتسين،
نه اولار، بير نئچهسي كوت گئتسين.
يئنه جانلانسين اوشاقليق چاغيميز،
گزسين اللرده قيزيل قازماغيميز.
ائله بيل كؤرپه اوشاقدير اوغلون،
فرحيندن اوچاجاقدير اوغلون!
آنا جان! كيبريتي چك، اومسونارام،
تنديرين يانماسا، بيل، من يانارام.
چاره تاپ بسلهديگيم آرزولارا،
چؤرگين ياخشي بيشندن سونرا
بورويوب اسگييا بير شورباليغي
اونو باسدير كوله، تنديرده بيشير.
اوغلونون خالقا اياندير قيليغي.
سالارام يوخسا اوشاقلارتك هشير.
يئيريك شورباليق اوستوندن اوزوم،
سنه قوربان اولوم آنجاق من اؤزوم.
سنه زحمتسه ده تئز كوندهني ياي،
ياي، ناخيش وور، آنا جان، تنديره ياپ.
گلير اوندان آنا تورپاق اتري،
اينجه گوللر بيتيرن باغ اتري.
اتري گلديكجه بيزيم بورنوموزا
داها چوخ باغلانيريق يوردوموزا.
اونو اؤپدوكجه گؤزوم، هم دوداغيم
برك دورور، يئردن اوزولمور آياغيم.
سن كئچركن. آنا، تندير باشينا،
باخيرام قارتك آغارميش ساچينا،
آنيرام قملي كئچن گنجليگيني.
گؤرمهديك اوندا سنين دينجليگيني.
ايندي سن بارلي آغاجسان، باشي ديك،
ايفتيخار ائت، آنا جان، بيز سنينيك!
سن چتينليكلره گؤسترمهدين اوز،
آناسيز اولماسين هئچ بير گونوموز.
آنا! سوفرنتك آچيقدير اورگين،
هر زامان بوللوجا اولسون چؤرگين!
آنا جان! تنديره دولدور اودونو،
سئير ائدك تنديرينين گور اودونو!
بؤلوم : شعرلر یازار : اوختاي نژادمحمد 5 باخیش
آذربايجانا گلسين
آذربايجانا گلسين
وطنيمين سئيرينه چاغيريرام ائللري،
ثروت گؤرمك ايستهين آذربايجانا گلسين!
بضايب باشدان-باشا شهرلري، كندلري
جنّت گؤرمك ايستهين آذربايجانا گلسين!
قانيميزدا دؤور ائدن صداقتدير، صداقت،
گونشدن ده پارلاقدير گؤزومدن بو حقيقت.
دوستونا، قارداشينا تمنناسيز محبت،
حؤرمت گؤرمك ايستهين آذربايجانا گلسين!
گؤزلليكلر وطنه گؤزللريندن گلير،
دوستلوغون-قارداشليغين تمللريندن گلير،
كؤنوللرين نيوقددس عمللريندن گلير،
قودرت گؤرمك ايستهين آذربايجانا گولسين.
سايسيز قهرمانلارين
قوروب يارادانلارين،
قوجاسيندا، گنجينده، بو ساده اينسانلارين
شؤهرت گؤرمك ايستهين آذربايجانا گلسين!
پاييزيندا، قيشيندا، باهاريندا، يازيندا
دينير دوستلوق نغمهسي كونوللرين سازيندا.
صاباحا آدديملايان مرد اوغلوندا، قيزيندا
قئيرت گؤرمك ايستهين آذربايجانا گلسين!
زاوالسيزدير عومورلوك قوينونداكي باغچا، باغ،
محبتي، شؤهرتي دولاشير اويماق-اويماق،
آل بايراقلار آلتيندا آلنياچيق، اوزواغ،
ميللت گؤرمك ايستهين آذربايجانا گلسين!
بؤلوم : شعرلر یازار : اوختاي نژادمحمد 2 باخیش
گئجهنين رومانتيكاسي
گئجهنين رومانتيكاسي
بو ياتميش كوچهلرده بو گئجه منم آييق،
منم آدديملاريملا بو سوكوتا ياراشيق.
دئييل يالنيز بو گئجه، بير چوخ گئجهلر بئله،
چيخاراق كوچهلره گزيرم گوله-گوله.
يئريگيرم - خياليم، اورگيم، بئينيم آتش، -
سونسوز نشه دويورام، بو سونسوز گزهاگزدن
آياقلار سيلمهسينلر دئيه، قورودور گونش -
كوچهلره يازديغيم شئريمي سحر تئزدن.
بو گئجه تكباشيما گزيرم كوچهلري؛
باخيرام بيرلشمهدن گؤزلريمين چپري.
يئريگيرم، شئريمي اؤتهرك دوداقالتي.
ايشيغام قارانليقدا، دئييلم بير قارالتي.
بو اولدوزلو، بو آيلي، بو ايلهاملي گئجهده
يئريگيرم، منيمله يئريگير بو گئجه ده...
يوردومون آدديميندان گئري قالمير آدديميم،
اولدوزلار رقص ائديرلر دؤورهسينده آديمين...
يئريگيرم، عمليم اليمده فانار كيمي،
باخيشيملا سماني كسيرم بير نار كيمي.
قلبيم اود آلسين دئيه، اودورام اولدوزلاري،
شئريمين كؤهنه دوستو، گؤز ووران اولدوزلاري
منم آدديملاياراق سوروين اؤز كؤلگمي،
منم گنج اورگيمده داشييان، گنج اؤلكمي.
بو اولدوزلو، بو آيلي، بو ايلهاملي گئجهده
يئريگيرم، منيمله يئريگير بو گئجه ده...
ائولرين قاپيسيندا گؤز قيرپا-قيرپا يانان
ائلئكتريك لامپاسي دئييل، ميصراعلاريمدير.
تا اوزاق پنجرهدن قيلينج كيمي اوزانا
ايشيغين پروانهسي منيم اؤز ديلداريمدير
بيليرم كي، سئوگيليم باخاراق يوللاريما
نيگاران گؤزلرييله هر آن گؤزلهيير مني؛
او بو ساعت گؤرمهيير اولدوزو دا، آيي دا،
بير خيال عالمينده سانكي ايزلهيير مني.
باشقا بير پنجرهده منيم شاعر يولداشيم
بير باخينيز، داياميش باشيني ماساسينا.
دئيير كي، سؤز تاپ، باشيم، دئيير كي، سؤز وئر باشيم
اؤلمز سؤزلر گركدير اؤلمزلر دونياسينا!..
باشقا بير پنجرهده فيكره دالميش موهنديس،
گلهجك بوروقلارين نقش ائدير جيزگيسيني.
بير داها گولدورمكچون بو يوردون گوزگوسونو
يئرلرين آلت قاتيندا آرايير قيزيل دنيز.
بو اولدوزلو، بو آيلي، بو ايلهاملي گئجهده،
يئريگيرم، منيمله يئريگير بو گئجه ده.
آرتيق من ساحلدهيم... بو ساحل منه تانيش،
بو ساحل منه ياخين، بو دئييل بير آلدانيش
من ده ايلك گنجليگيمده، ايلك باهار سماسيني
اؤز سئوگيليمله بيرگه سئير ائتميشم بو سودا.
اوداراق سالخيم-سالخيم دنيزين هاواسني:
دورموشام سئوگيليمچين بو ساحلده پوسقودا،
بسدير بو قدر گزدين، دئديم اؤزوم اؤزومه،
گئجه گؤرهسن، قولاق آساجاقمي سؤزومه؟
گئجهنين قولاغينا: "گوندوز گلير، قاچ!"-دئديم.
- سئوگيليم، گونش دوغور، پنجرهني آچ!- دئديم!
بؤلوم : شعرلر یازار : اوختاي نژادمحمد 0 باخیش
اولماسايدي
اولماسايدي
دينمزدي ماهنيم منيم، گلمزدي شئريم جانا،
گونش بايراقلي مين-مين سحريم اولماسايدي،
چينار كيمي قول-بوداق آتمازديم دؤرد بير يانا،
باكيتك بير قهرمان شهريم اولماسايدي.
چاشباش اولوب قالارديم من يوللار آيريجيندا،
گؤزل آنا يوردومون تورپاغيندا، داشيندا.
قانيم كيمي قاينايان بولاقلارين باشيندا،
آچيلان سوفرهلردن خبريم اولماسايدي.
يارامي قارا گونده ماهنيلاريملا سارديم،
دالغالاري آوارتك بو اللريمله يارديم.
من اورك سؤزلريمي هارا، هارا يازارديم،
ميليون-ميليون اوركلر دفتريم اولماسايدي!
كؤنوللردن سيلينيب آديم اونودولاردي.
اورگيمه دونيانين قم-قوسسهسي دولاردي.
پاييز چيچكلريتك ماهنيلاريم سولاردي،
زحمتيمين سونوندا ظفريم اولماسايدي.
گنجلر ساحل بويونجا خيالا دالارديمي؟!
منيم شعرلريمده بو آهنگ اولارديمي؟!
گؤزللرين گؤزلري معاويه چالارديمي
شهريمين آيناسي خزريم اولماسايدي؟!
اورگيمدن كئچهني آچيق دئييم سيزه من:
گنجليگيمدن وورغونام گونشلي گوندوزه من،
چيخمازديم ائل ايچينه، گؤرونمزديم گؤزه من،
بئش-اوچ نظره چارپان اثريم اولماسايدي!..
چوخداندير بير وصالين سئوداسي وار باشيمدا،
ياخشي بيلير بو سيرري دوستوم دا، قارداشيم دا.
من جاوان گؤرونرديم اينانين بو ياشيمدا.
دردلي آرازلا باغلي كدريم اولماسايدي!
خالقيمچون قازانميشام شؤهرتي من، آدي من.
عشقيمدن ياراتميشام بو گؤزل حياتي من.
ماهنيلارلا بزرديم بوتون كايناتي من،
بير گون تورپاق آلتينا صفريم اولماسايدي!
بؤلوم : شعرلر یازار : اوختاي نژادمحمد 0 باخیش
منيم فلسفم
دويونلو سؤزلردن هئچ گلمز خوشوم،
آيدين حقيقتدير منيم فلسفم.
وطنه، ميللته، قارداش ائللره
درين محبتدير منيم فلسفم.
دومانلي آرزولار، خام خيال دئييل،
شان-شؤهرت اوغروندا قالماقال دئييل؛
فيتنه-عصاد دئييل، پوچ آمال دئييل،
حاقدير، عدالتدير منيم فلسفم.
من چوخ بلالارا گرميشم سينه،
حاقي يازماميشام هئچ واخت ترسينه.
اولو بابالارين ياخشي ارثينه
ابدي حؤرمتدير منيم فلسفم.
معناسيز عداوت نَييمه گرك،
دار گونده مال-دؤولت نَييمه گرك،
عاجيزليك، عطالت نَييمه گرك،
هونردير، جورتدير منيم فلسفم.
خالقيمين شؤهرتي توتوب جاهاني،
اودور ديليمدهكي ماهنيمين جاني.
مسلك دوشمنييله دؤيوش زاماني
يالنيز رشادتدير منيم فلسفم.
گرك سون وئريلسين هر فلاكته،
اينسانام، دوشمنم ظلمه، وحشته؛
آزادليق عاشقي بشريته
جان-باشلا خيدمتدير منيم فلسفم.
زحمتسيز بير عومرون نه معناسي وار؟
اينسانا ظفرسيز ياراشماز ووقار.
قارداشا، يولداشا، دوستا اعتبار،
دوشمنه نيفرتدير منيم فلسفم!
بؤلوم : شعرلر یازار : اوختاي نژادمحمد 0 باخیش