سولئيمان روستم
آنا و پوچتاليون
آنا و پوچتاليون
دؤرد آي واردي، آنانين گؤزلري يول چكيردي،
باشقا بير دردي يوخدو، اوغول دردييدي دردي.
سوروردو: - "بالام هاني؟" - هار جبهه‌دن گلندن
اوندان خبر گلمه‌يير، خبر گلير اؤلندن.
يئرمي باتدي اوغلوم، گؤيمي چيخدي اوغلوم؟
بلكه من يانيلميشام، ازلدن يوخدو اوغلوم؟!
ائل بيلير، اوشاقليقدان او ناخلف اولماييب.
اورگيمه داميب كي، اوغلوم تلف اولماييب...
سبب نه دير كي، يازمير آنايا بيرجه كاغيذ،
اوغول، اوغول، - دئمكدن قابار اولدو ديل، آغيز!
قلبينده‌كي ايلك يارا تازايدي، بو ايلكييدي؛
اونو بو حالا سالان نوبارييدي، ايلكييدي.
قالخيردي ياتاغيندان دان يئري سؤكولنده...
هر قاپي آچيلاندا، هر قاپي دؤيولنده،
ديكيليردي آنانين گؤزلري بير نقطه‌‌يه.
سئوينيردي: - "اوغلومدان بلكه مكتوب وار!" - دئيه.
دؤرد آي واردي، آنانين گؤزلري يول چكيردي،
باشقا بير دردي يوخدو، اوغول دردييدي دردي.
تانيمايان تاپيلماز مهله‌ده پوچتاليونو،
هامي ايستردي اونو، هامي سئوردي اونو.
اونو تانيييرديلار آداملار آدديميندان،
بير بايرامدا چانتاسي دولو گلديگي زامان.
آنايا شاد خبرلر گتيرميشدي واختيله،
ايندي كاغيذ آلمايان آنا گله‌رك ديله،
سؤيله‌دي پوچتاليونا بير نئچه آجي كلمه:
"مكتوب اولماسا، بير ده سن بو هيته گلمه!"
پوچتاليون سؤز دئمئدي، ديلسيز دايانيب دوردو،
ائله بيل داغ باشيندا اونو ايلديريم ووردو...
آنانين گؤزلرينده سوال گؤردو بير ييغين،
باشيني يئره ديكيب داياندي خئيلي دالغين.
سينه‌سيني اؤتوروب سونرا كوچه‌يه چيخدي،
فيكيرلر، دوشونجه‌لر حساس قلبيني سيخدي.
دئييردي اؤز-اؤزونه: - آنانين حاقي واردير،
گئنيش دونيا اوغولسوز اونون قلبينه داردير...
دؤرد آي واردي، آنانين گؤزلري يول چكيردي،
باشقا بير دردي يوخدو، اوغول دردييدي دردي.
گونلر كئچدي... پوچتاليون بو هيته گيرمه‌دي،
آنا، گؤزويله اونو چوخ آرادي، گؤرمه‌دي.
بوتون هيتده‌كيلر اؤيرنميشديلر اونا،
هامي دئدي: "گؤره‌سن نه اولدو پوچتاليونا؟!"
بو قوجا پوچتاليون دا آنايا بير درد اولدو؛
يولونو گؤز‌له‌مكدن هر گون گؤزو دؤرد اولدو.
هئچ اولماسا پوچتاليون بو هيته گلنده،
مكتوب آلان قونشولار سئويننده، گولنده،
اوغلونو خاتيرلاييب سئوينيردي آنا دا -
سئوينجيندن هامي‌نين پاي دوشوردو اونا دا.
آنا دوشوندو: "بلكه قلبيني قيرديم اونون،
كيم بيلير نه گليبدير باشينا پوچتاليونون...
بلكه اونون دا اوغلو قانلي دؤيوشلرده‌دير،
كيم بيلير، بلكه او دا منيمله بير دردده‌دير...
خسته‌دير، باخان يوخدور بلك ده پوچتاليونا،
ائولريني بيلسيديم، بير باش چكرديم اونا.
بوندان آرتيق نه گلر، نه گلر كي، اليمدن؟!
كاش كي او سؤزلر منيم چيخمايايدي ديليمدن!
مكتوب گتيرمسه ده، قوي گلسين، گؤرك اونو،
سئوير بير آنا كيمي بو دردلي اورك، اونو..."
دردلي آنانين آرتدي ايندي بيره اون دردي،
بير دوغما اوغول دردي، بير ده پوچتاليون دردي...
بير گون كوچه قاپيسي آچيلدي چوخ سرعتله،
قونشولار چيخدي ائودن تعجبله، حئيرتله.
گؤردولر كي، پوچتاليون الينده مكتوب گلير،
ائله بيل جايناغيندا قارتال اوو توتوب گلير.
آلديلار بير قيرپيمدا پوچتاليونو دؤوره‌يه،
- مكتوب كيمه‌دير؟ سؤيله، نييه دينميرسن، نييه؟
زيلله‌ييب گؤزلريني آنانين گؤزلرينه،
پوچتاليون قاناد تاخدي اؤز شيرين سؤزلرينه:
- بوندان نئچه گون اوّل مندن كوسن، اينجيين،
"مكتوب اولماسا، بير ده بو ائوه گلمه! - دئين
مرحمتلي، مؤحترم آنايادير بو كاغيذ!..
هامي بير سسله دئدي: "گؤزلرين آيدين، آي قيز!"
آنا، گؤزلري ياشلي، عطير ساچدي ديليندن،
تئز اؤپدو پوچتاليونون مكتوب وئرن اليندن...
بؤلوم : شعرلر یازار : اوختاي نژادمحمد 0 باخیش
